ಮಿಣುಕು ಹುಳ
ಇಲ್ಲೊಮ್ಮೆ ಮತ್ತಲ್ಲೊಮ್ಮೆ
ಮಿನುಗಿಸಿ ಮುದವಿಟ್ಟ
ಮಿಣುಕು ಹುಳ ನಾನು
ಕ್ಷಣ ಕ್ಷಣಕೆ ಮಿಂಚಿಸಿ
ನೋಟಕ್ಕೆ ರೋಮಾಂಚನವಿತ್ತ
ಮಿಣುಕು ಹುಳ ನಾನು
ನಾನೆಲ್ಲೆಂದು? ನಾನಿಲ್ಲೆಂದು!
ಹೀಗೊಮ್ಮೆ ಹಾಗೊಮ್ಮೆ ತೋರಿದ
ಮಿಣುಕು ಹುಳ ನಾನು
ಬೆಳಕಿತ್ತರೂ ಬೆಳಕಿಗೆ ಬಾರದ
ಕುತೂಹಲಕಾರಿ ಜಂತು
ಆ ಮಿಣುಕು ಹುಳ ನಾನು
ಪ್ರಕಾಶಿಸಿದರೂ ಪ್ರಕಾಶಿಸದ
ನಿರುಪಯುಕ್ತ ಬೆಳಕನೀವ
ಮಿಣುಕು ಹುಳ ನಾನು
ಮುಟ್ಟರೆ ಸುಡದ, ಬಚ್ಚಿಟ್ಟರೂ ಮೆಚ್ಚಿಸುವ
ಇದ್ದರೂ ಇರದ, ಇರದಿದ್ದರೂ ಇರುವ
ಮಿಣುಕು ಹುಳ ನಾನು
ನನ್ನಸ್ತಿತ್ವ ನನಗೆ ಎನ್ನಬೆಳಕೆನಗೆಂದು
ನನ್ನತನಕೆ ಸೀಮಿತ ಜೀವಿಯಾದೆ
ಆ ಮಿಣುಕು ಹುಳ ನಾನು
⁃ ನಾ ಶ್ರೀ ಮೋಹನ
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ